Followers

Tuesday, April 30, 2013

ഒരു മെയ് മാസ വെയിലിൽ

ഒരു  മെയ് മാസ വെയിലിൽ

 അകലെ പ്രത്യാശയുടെ
മൃഗ  തൃഷ്ണ തീർത്ത്
തലയ്ക്കു മുകളിൽ 
ഉച്ചവെയിൽ

അപ്പോളും അവന്റെ  മനസ്സിൽ
ആരും  ചൂടാത്ത  
ചുവന്ന ഗുൽമോഹർ
 പൂക്കളായിരുന്നു

ഇത്രയൊക്കെ  നിറമുണ്ടായിട്ടും
ഇത്രപേർ  വാഴ്ത്തിയിട്ടും
എന്താവും   ആരും
ഗുൽമോഹർ  പൂക്കൾ 
മുടിയിൽ ചൂടാത്തത്

 പൊരിവെയിലിനെ 
അവഗണിച്ച് 
അപ്പോൾ  വന്നൊരു
ഇളം കാറ്റിൽ
ഗുൽമോഹർ  പൂക്കൾ 
അവന്റെ  ചെവിയിൽ
രഹസ്യം  പറഞ്ഞു

“ഇല്ല  കുമാരേട്ടാ
നമുക്കുമൊരു   കാലം വരും
എന്നെയും നിന്നെയും 
ലോകം  ആദരിക്കുന്ന
നമ്മൾ  എന്നും 
സ്വപ്നം കാണുന്ന
ഒരു  ദിവസം
അതുവരെ  നിശ്ശബ്ദമായി
ഈ കാലിറ്റലിഞ്ഞും
  വെയിലിലുരുകിയും
നമുക്ക് നമ്മുടെ
നിയോഗങ്ങളിൽ  വെന്തുരുകാം “

  അവനാവേശത്തോടെ
വീണ്ടും  ചുറ്റികയാഞ്ഞടിച്ചു
കരിമ്പാറക്കല്ലുകളിൽ 
തീപ്പൊരി  ചിതറി
ചുവന്ന  പൂക്കൾ
  അതുകണ്ടൂറിച്ചിരിച്ചു

Monday, April 15, 2013

ചെറുപ്പം.



ഇന്നെന്നെ നോക്കി
ദിനവും പരിഹസിക്കുന്നു
ഓണത്തിനും വിഷുവുവിന്നും
വിരുന്നുകാരായി മാത്രം വന്ന
പുട്ടും പഴവും  പിന്നെ
പല  തരം വിഭവങ്ങളും .


തൊണ്ടയിലെവിടെയോ
ഇന്നും കുരുങ്ങി കിടപ്പുണ്ട്
ഉണക്ക  വറ്റും  ഉപ്പും
പച്ച  വെളിച്ചെണ്ണയില്‍
ചേര്‍ത്ത്  കുഴച്ച  ഒരുരുള

 പതിവു ഗോഷ്ടികള്‍ക്കിടയിലും
കണ്ണടിയില്‍ നോക്കി
ദിവസവും ഉറപ്പ് വരുത്താറുണ്ട്
കഴുത്തില്‍ മെല്ലെ  തടവി
ആ ഓര്‍മ്മകള്‍

 പ്രായം സമ്മാനിച്ച
അല്പം  നരയും  ചുളിവും
ഒര്‍മ്മകള്‍ക്കിനിയും
മങ്ങലേല്‍പ്പിച്ചിട്ടില്ല

ഇല്ല  എനിയ്ക്ക് മാറ്റമൊന്നും
അധികം  വന്നിട്ടില്ലാ
നോക്കൂ ഇപ്പോളും ഞാന്‍
വളരെ ചെറുപ്പം  തന്നെ

Sunday, April 7, 2013

കവിതേ.............

കവിതേ.............

കവിതേ,  മണലൂറ്റുകാരുടെ
കയ്യിലകപ്പെട്ടൊരു
പുഴയാണു നീയിപ്പോൾ

ആദ്യം  അവർ  നിന്നെ  വാഴ്ത്തും
 വാനൊളം  പുകഴ്ത്തും,
അപദാനങ്ങൾ  പാടി
 നിന്നെ  അഹങ്കാരിയാക്കും 
കുണുങ്ങി  കുലുങ്ങി
നീ  അവരെ  നിന്റെ ജല
വിശുദ്ധിയിലേക്കു  ക്ഷണിയ്ക്കും

 തഴുകിയും  തലോടിയും
ഓരോ  മണൽ  തരികളും
അവർ വാരിയെടുക്കുമ്പോൾ
ആഴം കൂടുന്നതിൽ നീ  ആഫ്ലാദിക്കും
ഒഴുക്കു  കുറയുന്നതറിയാതെ

ഒറ്റുവിൽ ഓർമ്മയിൽ
  ഒരു  കുളിർ  മാത്രമായി,
മുന്നിലൊരു  നെടുവീർപ്പു പോൽ
  നീ  ഒടുങ്ങുമ്പോൾ
സംരക്ഷകരായി വീണ്ടും  വരും
പണ്ട് നിന്നെ  വിറ്റ്
മണി മാളികകൾ  തീർത്തവർ