Followers

Monday, December 31, 2012

.................

 ഹിമകണമല്ലിത് കാൺക
  ചുട്ടുപൊള്ളുന്ന  കണ്ണുനീരെന്നെത്ര
പേരലറിയാർത്ത് വിളിച്ചിട്ടും
ഇളകാത്ത നിർഗുണത്വമേ
 
വ്യാസ മൌന  നിശ്ശബ്ദതേ,
അകർമണ്യതേ  വാഴ്ക
വാഴ്വിലുയരുമഗ്നിയിൽ
വെന്തുരുകാതെയൊളിച്ചീടുക

 വികസന  വിടുവായിൻ
വളർച്ചാ നിരക്കിലഭിരമിച്ചീടുക
വിഷാദ  രോഷ വിലാപങ്ങൾ 
കേട്ടില്ലെന്നും  നടിയ്ക്ക

വരുമൊരു പ്രധിഷേധ
പ്രളയമൊരിക്കലതിൽ
തകർന്നടിഞ്ഞീടാനായ്
ഒരുങ്ങീടുക മറക്കേണ്ട



Monday, December 17, 2012

യോജിപ്പ്

യോജിപ്പ്

അശാന്ത  മൌനമാം
ദിന  രാത്രങ്ങളുടെ
വിഴുപ്പലക്കലുകളുടെ
ഒടുവിലവര്‍  തീരുമാനിച്ചു
  “നമുക്ക് പിരിയാം “ ,

സ്വകാര്യതകളുടെ
നിലയില്ലാ  കഴത്തില്‍
 അവര്‍ ഇരു  ധ്രുവങ്ങാളായി

എങ്കിലും അവരുടെ
  ചിന്ത മുഴുവന്‍ 
മകള ആരെ കൂടെ
കിടത്തും  എന്നായിരുന്നു .


Wednesday, December 12, 2012

സമര്‍പ്പണം

 സമര്‍പ്പണം

തണുത്ത പച്ചക്കറികളുടെ
ഇനിയും കേടായിട്ടില്ലെന്ന
മരവിപ്പ് വെട്ടി നുറുക്കി

എന്ത് വേണേലും
ചെയ്യൂ എന്ന്
 ഒരല്പം മരവിച്ചിരുന്ന്


 അടുക്കളയില്‍ 
പല  രൂപത്തില്‍ 
തിളച്ചു  മറിഞ്ഞ്

മെല്ലെ വെന്തുരുകി
കണ്ണിര്‍ വറ്റിയൊരല്പം
വെറുതെ വിശ്രമിച്ച്

 ഇടയ്ക്കിടെ ബ്രേക്കിംഗ്  ന്യൂസ്
  തരുന്ന  വിധിയുടെ
ചാനല്‍  തിരഞ്ഞ്


മുറിയുടെ മുക്കിലും മൂലയിലും
അരിച്ച് പെറുക്കി
ഓരോ  ചിന്തയും
തൂത്ത്  വാരി
കഴുകിയെടുത്ത്

 കുളിമുറിയില്‍  കൂട്ടിയിട്ട
അഴുകിയ  തുണിയോടൊപ്പം
നുരഞ്ഞ്  പൊങ്ങി
വെയിലിലൊന്നാറി
കാത്ത്  കാത്തിരുന്ന്

  മണിയൊച്ച  കേട്ടാല്‍
ഓടിച്ചെന്ന് വാതില്‍ തുറക്കണം
  എന്നെ  എടുത്തിട്ടലക്കി
  ഞെക്കി പിഴിയാന്‍