Followers

Thursday, May 28, 2015

മഴേ നീ എന്നാണു പെയ്യുക !

മഴേ  നീ  എന്നാണു  പെയ്യുക !


നനഞ്ഞ് കുതിർന്ന്
വയൽ  വരമ്പിലൂടെ
സ്കൂളിലേക്ക്  പോകാനും ,

ഇന്റർവെൽ  സമയത്ത്
 മതിലിൽ നിരായ്  നിന്ന്
മഴവെള്ളത്തിലേക്ക് മുള്ളാനും,

പണ്ടൊരിക്കൽ  നടന്ന  പോലെ 
ഒരുവളെ  ചേർത്ത് നിർത്തി
അടക്കം  പറഞ്ഞ്  ചിരിച്ച്
  ഒരേ കുടയിലങ്ങനെ  നീങ്ങാനും

മഴയിരമ്പം കേട്ട് മൂടിപ്പുതച്ച്
കൂടെയുള്ളവളെ  ഒന്നൂടെ
അരികിലേക്കടുപ്പിച്ച്
പുതപ്പിലേക്ക്  വലിഞ്ഞ്
നിശ്വാസങ്ങളിലലിഞ്ഞ്
മതിയാവോളമുറങ്ങാനും
വല്ലാണ്ട് പൂതിയായിട്ടല്ല ,

ഞങ്ങൾ  പണ്ടാരടങ്ങി
  പോകാതിരിക്കാൻ
ഇനിയുമിനിയുമൊരുപാട്
കാലമീ പച്ചപ്പെങ്കിലും  
കണ്ട് പകച്ചിരിക്കാൻ
ഇനിയുമൊരു  മഴ
എന്നാണു  പെയ്യുക !!

Friday, May 15, 2015

മധുരമീ ജീവിതം

മധുരമീ  ജീവിതം

ദീന  ദൈന്യങ്ങളിൽ
അമ്മയുടെ സാന്ത്വനം  പോലെ
കാട്ടുജീരകവും അയമോദകവും
 എരിതീയിൽ വറുത്തെടുത്ത്
സ്നേഹജലമൊഴിച്ച്
 ഊതിത്തണുപ്പിച്ച്  കുടിച്ചിട്ടുണ്ട്

ജീവിതത്തിന്റെ  വക്കു പോയ 
പിഞ്ഞാണത്തിൽ
ആടലോടകത്തിന്റെ
കയ്പ്പ് പോലും  ഔഷധമാക്കി
മടിയില്ലാതെ കുടിച്ചാണു
ഇവിടം വരെയെത്തിയതും

ചെന്നിനായകം പോലെ
കുടിച്ചിറക്കിയിട്ടുണ്ട്  ജീവിതം 
പലപ്പോളും പലതവണ,

കയ്പ്പിന്റെ   ഭയത്താൽ
മധുരമോഹങ്ങളെ
അന്നേ   പടിയിറക്കി
പിണ്ഡം  വെച്ചതുമാണു.

എന്നിട്ടുമിപ്പോൾ 
ആരെല്ലാമോ പറയുന്നു
മധുരം കുറയ്ക്കണമത്രേ
പഞ്ചസാര  കൂടുതലാണത്രേ