ഞാനുമത് കണ്ടിരുന്നു.
ഞാനുമത് കണ്ടിരുന്നു ,
ആകാശ ചരിവിലൂടെ
പൊടി പറത്തി വരുന്ന
ടിപ്പർ ലോറികളുടെ
നീണ്ട നിര !!
അവസാനത്തെ പാറത്തരിയും
തൂത്തുവാരിയാർത്ത് ചിരിച്ച്
അനന്ത ശൂന്യതയിലൊരു
മഹാ ശൂന്യത നിർമ്മിച്ച്
ഈ നവഗ്രഹങ്ങളോരോന്നും
നമുക്ക് മാത്രം സ്വന്തമെന്ന്
അവരാക്രോശിച്ചുകൊണ്ടിരുന്നു !
“നോക്കൂ, ചന്ദ്രനില്ലിനി
ഇല്ല നമുക്കവന്റെ
ഗ്രഹണ ദോഷവും, നിലാവിൻ
കാപട്യവും പ്രിയ കൂട്ടരേ
തീർത്തൂ ഞങ്ങളവനെ
നിങ്ങളെ സഹായിപ്പാൻ “
ദുരയുടെ കണ്ണാൽ
ചൊവ്വയെ നോക്കി
വില്ലൻ ചിറി കോട്ടി
അവർ പിന്നെയും
അശ്ല്ലില ചിരി ചിരിയ്ക്കേ
ആകാശം മിന്നൽ പിണർ കാട്ടി
ഇടി വെട്ടി മുരണ്ട്
കൊടുങ്കാറ്റടിച്ച് വിറച്ച്
കോപമറിയിച്ച് കൊണ്ടിരുന്നു
അപ്പോളാണു
അടിവസ്ത്രം പോലും
കീറി മാറ്റിയപമാനിക്കപ്പെട്ട
ശാസ്ത്രം മോഹാലസ്യ
വിമുക്തയായി എഴുനേറ്റതും.
ഞെട്ടിത്തരിച്ച് നിന്ന
ജനങ്ങൾക്കിടയിൽ നിന്നും
എന്നെ കൂട്ടുപിടിച്ചവർ
നിങ്ങളെ ചതിച്ചെന്ന്
അവളും കരയുന്നുണ്ടായിരുന്നു,
പിന്നെ മെല്ലെയവൾ
ജനങ്ങളോട് ചേർന്ന്
അവരിലൊരാളായി
ജനസഞ്ചയത്തിൽ ലയിച്ചു,
കയ്യിൽ കിട്ടിയ വടിവാളും
കല്ലും പന്തവും കുന്തവുമായി
ജനങ്ങളവളോടൊപ്പം നിന്നു,
അവർ വീണ്ടും വരുന്നതും കാത്ത്
